Tionscadail Taighde Reatha
Tionscadail Taighde Reatha
Cad atá á dhéanamh ag an bhFoireann Taighde faoi láthair?
Táimid ag obair faoi láthair ar roinnt príomhthionscnamh taighde agus píolótach a bhfuil sé mar aidhm acu an t-oideachas ionchuimsitheach in Éirinn a fheabhsú.
Is féidir leat eolas a fháil faoi gach ceann acu sin ar an leathanach seo. Leagaimid amach thíos:
– Meastóireacht ar an gClár Píolótach Aistrithe de chuid na Straitéise Cuimsithí Fostaíochta (SCF), a thacaíonn le daoine óga faoi mhíchumas i ndiaidh dóibh an scoil a fhágáil
– Clár píolótach maidir le múnla tacaíochta an Dearaidh Uilíoch don Fhoghlaim (DUF) a bhaineann le 44 scoil
– Staidéar a scrúdaíonn na cúinsí a chuireann leis an éileamh méadaithe ar shocrúcháin i ranganna speisialta agus i scoileanna speisialta
Tá gach tionscadal á mheas go neamhspleách chun eolas a dhéanamh do bheartas agus do chleachtas amach anseo san oideachas speisialta.
Tionscadail Taighde Reatha
Taighde atá Coimisiúnaithe go Seachtrach ag CNOS
Tionscadail Taighde Reatha – Taighde atá Coimisiúnaithe go Seachtrach
Meastóireacht ar an gClár Píolótach Aistrithe de chuid na Straitéise Cuimsithí Fostaíochta (SCF)
Is clár píolótach é Aistrithe SCF a chuireann tacaíocht ar fáil do dhaoine óga faoi mhíchumas lena gcuid roghanna i ndiaidh dóibh an scoil a fhágáil.
Tá dhá ghrúpa páirteach sa chlár píolótach seo. Baineann Grúpa a hAon le scoileanna príomhshrutha agus le scoileanna speisialta agus thosaigh sé i scoilbhliain 2022/23. Baineann Grúpa a Dó le scoileanna speisialta amháin agus thosaigh sé i scoilbhliain 2024/25.
Choimisiúnaigh CNOS RSM (a dtugtar Fortia Insight anois air) chun meastóireacht a dhéanamh ar an gclár seo chun an tionchar atá aige a fháil amach. Thosaigh an mheastóireacht do Ghrúpa a hAon in 2023 agus lean sí ar aghaidh in 2024 agus thosaigh an mheastóireacht do Ghrúpa a Dó i mí Aibreáin 2025.
Tionscadail Taighde Reatha – Taighde atá Coimisiúnaithe go Seachtrach
Meastóireacht ar Mhúnla Tacaíochta an Dearaidh Uilíoch don Fhoghlaim
Thosaigh CNOS ar mhúnla tacaíochta an Dearaidh Uilíoch don Fhoghlaim (DUF) mar chlár píolótach i Meán Fómhair 2024. Tá suas le 90 múinteoir in 44 scoil (33 bunscoil, 9 iar-bhunscoil agus 2 scoil speisialta) páirteach ann. Beidh sé ar siúl ar feadh dhá bhliain acadúla, 2024-25 agus 2025-26.
Tá sé mar aidhm leis an tionscadal tacú le foghlaim, le rannpháirtíocht agus le rannpháirteachas na ndaltaí trí chur le cumas na múinteoirí:
– Pleanáil don inathraitheacht
– Bacainní a laghdú
– Tacú le foghlaimeoirí seiftiúla, diongbháilte agus spriocdhírithe
I mí Dheireadh Fómhair 2024, choimisiúnaigh CNOS Edge Hill University agus Coláiste na hOllscoile, Corcaigh chun meastóireacht a dhéanamh ar mhúnla tacaíochta an DUF.
Is iad seo a leanas aidhmeanna na meastóireachta:
– A fháil amach cad atá ag obair go maith
– Feabhsuithe a aithint
– Tionchar an mhúnla a sheiceáil ar leibhéil an dalta, an mhúinteora, an tseomra ranga agus na scoile.
Tionscadail Taighde Reatha – Taighde atá Coimisiúnaithe go Seachtrach
Taighde trína bhfiosraítear na cúinsí atá taobh thiar den mhéadú atá tagtha ar an éileamh ar áiteanna i scoileanna speisialta agus i ranganna speisialta
Fiosraítear leis an taighde seo na cúinsí is cúis leis an méadú atá tagtha ar an éileamh ar áiteanna i ranganna speisialta agus i scoileanna speisialta in Éirinn le 20 bliain anuas.
Choimisiúnaigh CNOS Coláiste Hibernia agus Institiúid Oideachais agus Síceolaíochta Leanaí na hEorpa chun taighde deisce agus taighde eimpíreach a dhéanamh.
Áirítear sa taighde deisce cur síos ar thírdhreach beartais na hÉireann. Díreoidh sé seo ar phríomhathruithe beartais agus múnla, i dtéarmaí tacaíochtaí agus socruithe do scoláirí a bhfuil riachtanais speisialta oideachais acu i dtimpeallachtaí oideachais príomhshrutha agus i dtimpeallachtaí oideachais speisialta.
Baileofar sonraí agus treochtaí maidir le socrúcháin i ranganna speisialta agus i scoileanna speisialta in Éirinn leis an taighde agus déanfar anailís orthu freisin. Breithneofar sonraí leitheadúlachta leis agus déanfar comparáid idir iad agus sonraí agus treochtaí idirnáisiúnta. Scrúdófar leis an taighde eimpíreach tuairimí agus taithí na bpríomhpháirtithe leasmhara. Áirítear orthu sin:
– Tuismitheoirí
– Múinteoirí
– Scoláirí
– Grúpaí abhcóideachta
– Ceannairí scoile
– Eagraithe riachtanais speisialta oideachais
– Gairmithe cliniciúla
– Lucht déanta beartas
Tá an taighde seo le foilsiú go luath in 2026.
